فيديو | ملحمة وطنية للشاعر المهندس (خالد السرحاني) بمناسبة يوم التأسيس

ملحمة وطن ….

كلْ ثغرا في بلادي على حدّه عيون 

ساهرين مسهدين النّوى يرعونها 

صامدين وثابتين وكلْ حمل وله متون

الله و ثم المليك وارضنا ومادونها 

من شمال ومن جنوب الرحا داير طحون

برا وبحرا وجو جندنا يديرونها 

بالتّخوم وبالسهول بالبحور وبالعيون

بالجبال وبالنفود والهضب وحزونها 

الشّمال ارعد ورعّب رعاعا مهلكون

كفكفوا ايديّهم واكمموا ردونها 

والحزم والعاصفه من جنوبا يردعون

والأمل كم عيلةً باليمن يرعونها 

والحكومه في مشاريع نهضه ينفقون

والمدارس والبنى التحتا هم يبنونها 

جامعات وانديه كل بلده به سجون

والكهارب واصله كل بلد يضوونها 

توسعات بالحرم فوق ماتتصورن

بعدِ كل موسم حجيج مكة يطورونها 

بفضلِ ربي كل سنه كم مليون ايشرّفون

في رخا آمن بقاع مكة ايزورونها 

والمناطق طوروها كل يوم نشوف لون 

والرياض العاصمه ازدهت في لونها

والخبر له افردو مصدرا به يربحون 

عايداته للوطن كلها يذرونها

ديرتي مستطونه ،بالقلوب وبالعيون

بالعماق جذورها وكالسحاب اهتونها 

في تراب المملكه كم مولع اوفتون 

افتتن حتى غدا بالهوى مفتونها

ديرتي لاماتباع ديرتي ماله زبون

كود أبو تركي والاجرب معْه ازبونها 

قادها في يمنن وعزمته لا ماتهون 

في يساره بطش للي يبي يهونها 

حاذاها للعز وساقه وهو الها نمون

وورثه لاخوان نوره وهم نمونها

للقياده كنهم بالعيار يقيسون

والسهام مقيسه لابغو يرمونها

بالسيوف مقلدين كل حوضا ياردون

كل نفسا لا عصت ربّها يردونها 

من سنا سيف العقيده بالشريعه يحكمون 

والعصاة إن عوّثوا دمغهم يسحونها

شايمين عن الطغى وللوغى يتسارعون

وألقى ما به وقى والعِدا يطحونها 

يعتلون المرتبه قبل ماله ينصبون

سارعوا صعدَ الهمم والعلا يرقونها

هيّنونا ليّنون والنجوم يزاحمون 

والعسيره من سعه لليسر يحدونها 

خادمين ملوكنا وباللقب يتوارثون

يخدمون اطهر بقاع الله اويحمونها

ساسوا الدوله برو بالسياسه حاذقون 

كم عظيما دولته جدّعوا عرنونها

السعد بسعود وفي عهده ازدانت شئون 

كلِّ عيله وصلها عيشها مع موونها 

ثم عهد الفيصل امعطش الفحل الضعون

ملقم أمريكا حجر حصبته صهيونها 

ثم عهد الي دفن فقرنا مع الديون

خالد الي نسيو الناس معه ديونها 

ثم عهد المعرفه فهد والرّاي الوزون 

قاد رسن المملكه لين شد رسونها 

ثمِّ بعده الذي شج فرقاه الشجون 

جود ابو متعب سحاب وعطاه مزونها 

ثمِّ سلمان الذي اسفرت له الحسون 

فرّعت له كل دوله عظام حصونها 

أفزع بحزمه عدوّينه ودك الحصون

بدد وفتت خطط للبلد يرجونها ….

مع ولي عهدٍ معه في دهاء الارطبون

والولي نهض وطن بالرؤى وفنونها 

وصّل أطراف اليمن لم لم المشتتون

 قبلِ زمرة الحوث بالجهل يفرونها 

 دكهم لين انعمو جعلهم ما يبصرون

دقهم لين اهلطوا روسهم وذقونها 

بالعروبة يدعون وللعرب يتصدرون

 وكل خيرات البلد لايران يوردونها

أخبط أخبط يا ولي العهد بفداك الحرون

الذي باع الشمَم ورضه ايسومونها

ابن سلمان وأبوه جعلهم له يسلمون

ويده اللي شدها ابوه مايقوونها 

ابن سلمان الحزم خزّم اللي يراوغون

واكحل بسيفٍ شطير الرمد بعيونها

وعاد هيكلة الوطن وهيأه حتى يكون 

مستعد لنضب الأرض إن نشف مخزونها

 رفّة ودعم شباب البلاد الطامحون

  وحقق أمالا لهم كانوا _يحلمونها 

قلل اعداد البطاله وزاد العاملون

 سعود اسواق السعوديه امن ابنونها 

نحمد المولى على كلّ سهما يسهمون

 والرماح رماحهم كيف مايبرونها

وفيصل النواف اميرنا وله مدّه وعون 

جوفنا قدرا تليد وهو غطا ماعونها 

في جنابه حلم وفي جانبه رو وغضون

قاد فك الجوف حتى قوت بسنونها 

ونايبه هو نايبه ناب عز الكيّسون

كاسيا مجد الأولى وزاهيته اردونها

يا أميرا نظرته نظرة الحر الفطون 

بيركم عز العمام والخوال شطونها 

في شوارع جوفنا لا مشيتو يذكرون 

ست عشر مليون غصنا تهز اغصونها 

والنخل وجذوعه من الطرب يتمايلون

هزت السعفات من دون مايهزونها 

الرطب كل ماتطب ديرةً لك يينعون  

في قدومك أبسر التمر ودل عرجونها

الوفا بآباءنا ورث آباء تالدون 

باليماني ابشوتهم والصعاب اكفونها 

يكرمون الضيف وما عنه يتقاعسون   

ورثنا عاداتنا اللي مانمشي دونها

تمرهم من حلوة الجوف لا جو يقدعون 

حلوا طعمها وحلوا بعد مخزونها

طيبها من ناسها ونخلها ري العيون 

اعتنوا بها اهليّتنا واو رثونها 

علّقوا في تمرنا كل من له يطعمون  

بعدها كل التمور عنهم يردّونها  

كالشهد في لذته زاهيه وسط الصحون

والقدوع ابدون تمرتنا مايعْدونها 

بالحوافط دبسها لمعته من يقلبون 

حافظات التمر دبس أسفله يعلونها 

سيري يارياح العز هبّي للي يرتجون 

العطايا الجزل من يدكم يرجونها 

لليتاما والدا والدا رفق وحنون 

كلْ ماشافو صورتك قاموا يخمّونها

زد زياراتك لنا الناس فيكم يفرحون 

كل خباث العمل جيتك يخشونها 

منزلك متواضعا عاليا من يعتلون 

منزله صعبه على من بغو يصلونها

كل جوف الجوف بك ياامير يأملون 

أمنياتاً طالما كانوا يأملونها 

اجتماعك بالأمين والثقافه والفنون 

والرعايه والمشافي ومن يالونها 

اجتماعك بالوزاره والرئاسة والشؤون 

والسياسه دارسه عارفا قانونها 

رافعينا روسنا وبك محسنين الظنون 

ياسِراج الجوف ويافخرها ومكنونها 

ازعبل نهض حفاوه فيك ومع من يحتفون 

قصر كاف واثره وراف وكل اخبونها 

كلّ ماجوه الأهالي بالمطالب يشرهون

لبى كل مطالبا جوه يطالبونها

 كم عويل وعيلة بالديون ايطَالبون 

كلّ ماجا عيلةً سد عنها ديونها 

طالبك يابن الأمير وكل حملا له ركون

ياحفيد ابن المؤسس وخذ مضمونها 

دومة الجندل حضارة ملوكا غابرون 

ضاربه في القدم والواجب أن نصونها 

فيها مارد الأبي قلعة منعا لدون 

دونها جيوشا ترد دونها مادونها 

فيها مسجد الفاروق مسجدا له يافدون

آمِرَن عُمر بِناه قبل غزو احجونها 

فيها متحفا عظيم دايماً له ياردون

كل عشّاق الآثار اللي يعشقونها 

كانت العرب تطوف الجزيره ويجون 

دومة الجندل وسوقه لزوم ايجونها 

اعظم اسواق العرب فيها وما فيها زبون 

تكفى يامير البلد همتك يجدونها 

فيها للشعر منابر عليها يخطبون

ينشرون اجزل قصايد يدوّنونها 

حول حول ايطوّفون ثمْ علينا يعوّدون 

كل موسما به امْطيّهم يرسونها 

يالفحل يابن البُزْل يفدى جنبيك اللبون 

هامتك عليا وحنا ليمينك عونها

جاك من شعري اجزاله ويتعب من يبون 

بالقصايد بعدي يم يمتك ينحونها

مشذبا لك بالوزون ويعجب اللي يميزون 

القوافي العسر و بحورها ووزونها

سقت لك بنات شعري ولك يتسابقون 

تَعْجز من يصدّها عنك ومن يثنونها 

 مسرجه من فوق قب آصل الخيل الصفون

 لا عدت تسرِّ وايضا يسرْ اصفونها

ريحها عطرا وله فوح مثل الزيزفون

 وصفها مثل الطيور لأصبحت بشدونها 

كلنا دون الوطن والشراذم يُرغمون 

في قيادة من حياض الرّدَى يردونها 

بين كرّ وبين فر من البساله يدرعون 

يفتكون بخضر الأعناق اويفرونها 

ربي سدد رميهم ياعظيما يرتجون 

مدّهم في يدك الي مايثنى عونها

ربي احمنا من اللي علينا يمكرون

واحم الأرض الطاهره لا يتناوشونها

✅